alema

Os usuarios dos ‘clubs de amigos’ dos xornais non falan galego

Como é posible que non apareza unha soa palabra en galego nas ducias e ducias de mensaxes que aparecen nos ‘clubs de amigos’ que hai nalgúns xornais do país? Seguro que algunha vez caeu algún deles nas vosas mans… eses que ofrecen “amistad“, “chico busca chica“, “chica busca chico“, “chico busca chico“, “chica busca chica” e ese morboso “otras relaciones“. O caso é que eu, polo que vin, non existe ninguén con vontade de relación en galego. É ben peor ca nas esquelas, onde polo menos o noso idioma vai asomando a orella.

Non podo crer que non haxa ningún usuario destes servizos que non empregue o galego como lingua habitual. Por que logo non aparece o galego nos anuncios? Será un servizo foráneo que non admite esa posibilidade? Ou será que os que acceden a esas páxinas de contactos presupoñen que non van ter éxito por anunciarse en galego?

Non o sei. O caso é que me dá algo de morbo probar… pero, francamente, de 1,16 a 1,50 euros por minuto por facer unha coña paréceme un calote coma un piano. De todos os xeitos, non coñecedes por aí alguén que quixese aliviar a súa soidade chamando a estes servizos? Que tal lle foi a experiencia? O que é innegable é que o servizo ten adeptos… porque senón non se explica que se publiquen anuncios deste tipo todos os santos días. Será isto máis efectivo ca a propia internet?

Bueno, sexa como for, máis ca o servizo en si preocúpame se é normal esta ausencia total do galego nas páxinas de “relacións dos xornais”. Pasará o mesmo co catalán? Son preguntas que de momento non teñen resposta…

26 comments Setembro 2nd, 2008